Kryetari i Partisë Demokratike, Sali Berisha — i shpallur persona non‑grata nga Shtetet e Bashkuara të Amerikës për “korrupsion të madh” dhe akuzë për cenim të procesit demokratik gjatë karrierës së tij politike — mbajti sot një konferencë për shtyp ku u shfaq si favorizues i lirisë globale, në një skenar që do të kishte bërë xheloz edhe superheronjtë e filmave.

Berisha e quajti vitin 2026 “vitin e përmbysjes së diktaturave” dhe, pavarësisht se SHBA-ja vetë nuk e lejon të hyjë brenda territorit të saj, ai i bëri thirrje pikërisht Uashingtonit që të ndihmojë opozitën iraniane në betejën për një Iran të lirë dhe demokratik — një aleancë ndërkombëtare që tingëllon sikur vinte nga një roman politiko‑fantastik.

“Regjimi i Iranit i ka ditët e numëruara. Liria e iranianëve ka çmimin e saj…” deklaroi Berisha, ndërkohë që ai vetë mbetet i kufizuar nga politika e jashtme amerikane për hyrje në SHBA.

Në stilin e një udhëheqësi që kërkon të përdorë megafonin e botës ndërkohë që i është mbyllur dera e oborrit të shtëpisë, Berisha gjithashtu bëri thirrje që SHBA-ja — po e njëjta që e ka shpallur non‑grata — t’i vijë në ndihmë edhe Shqipërisë pasiqë “populli shqiptar meriton lirinë e tij”.

Në një skenë që mund të quhej “ironike, por me synime globale”, Berisha duket se ka kaluar nga bojkotimi diplomatik te mbështetja e revolucionit iranian — megjithë faktin që vetë nuk mund të udhëtojë lirshëm deri në shtëpinë e demokracisë që ai po fton të ndërhyjë në çështjet e brendshme të një vendi tjetër!