Endri Çekiçi ka marrë një vendim të fortë, të guximshëm dhe padyshim gjeografikisht surprizues: jo Tiranës, po Irakut.

Ish-mesfushori i Kombëtares shqiptare ka refuzuar bardheblutë për të firmosur me Zakho SC, klub prestigjioz i “super kampionatit” irakian, aty ku futbolli luhet me pasion, vapë dhe Wi-Fi të paqëndrueshëm.

29-vjeçari ka hedhur firmën deri në fund të sezonit, duke e lënë Tiranën “me gisht në gojë” dhe me një pyetje të madhe: “po ne çfarë s’kishim?”

Çekiçi do të veshë fanellën e Zakho SC, ekip që renditet në vendin e 9-të, pozicion strategjik mes titullit dhe mbijetesës, aty ku ëndrrat janë ende matematikisht të gjalla, por jo shumë.

Burime pranë lojtarit bëjnë me dije se vendimi u mor pas një analize të thellë sportive, financiare dhe kulturore, ku Iraku fitoi bindshëm ndaj Superiores shqiptare. “Është një kampionat që po rritet çdo vit… të paktën në kilometra,” – thuhet se ka deklaruar lojtari.

Zyrtarizimi pritet gjatë ditës, ndërsa tifozët e Tiranës po përpiqen të kuptojnë se si humbën një ish-kombëtar ndaj një klubi që shumica e tyre e mësuan sot në Google Maps.

Çekiçi nuk u kthye në shtëpi, por zgjodhi aventurën. Sepse, në fund të ditës, jo çdo futbollist ka guximin të thotë:“jo Tiranës, po Irakut.”

(lajm satirik)