Shqipëria i tha sot “mirupafshim” kryeministres teknike më jetëshkurtër në historinë politike të vendit, Lea Ypi, e cila u largua nga vendi pasi u përfol për disa ditë si një emër i mundshëm për drejtimin e një qeverie teknike që… nuk ekziston ende.

Shkrimtarja e njohur, e cila sa herë shkel në Shqipëri prodhon më shumë debat se sa ligje në Kuvend, arriti këtë herë një rekord të ri: të bëhet kryeministre në imagjinatë, pa dekret, pa votë dhe pa zyrë, por me jehonë të plotë mediatike.

Pas përfoljeve intensive, komenteve politike dhe analizave televizive që sqaruan gjithçka dhe asgjë njëkohësisht, Ypi reagoi në Facebook duke njoftuar largimin nga Shqipëria. Ajo deklaroi se “llaçin e shpifjeve dhe pluhurin e konspiracioneve” ia ka lënë në derë vendit, ndërsa me vete merr emocionet e takimeve dhe diskutimeve filozofike. Sipas burimeve jozyrtare, pluhuri mbetet i bollshëm dhe llaçi do të përdoret për debatet e radhës.

E përmendur si opsion për kryeministre teknike, e komentuar nga Sali Berisha si “jo për t’u përjashtuar”, dhe e gjykuar nga një ushtri profilesh anonime, Lea Ypi arriti të bashkojë politikën shqiptare rreth një ideje të vetme: si të konsumohet një figurë publike para se të ndodhë ndonjë gjë reale.

Në statusin e saj lamtumirës, Ypi foli për labirinte, minotaurë dhe fillin e Ariadnës, ndërsa Shqipëria mbeti aty ku është më e fortë: në labirint, pa hartë, por me shumë ekspertë për çdo kthesë.

Kështu përfundon edhe aventura e kryeministres teknike pa mandat, e cila qëndroi në post për aq kohë sa zgjat një cikël lajmesh, një debat televiziv dhe disa statuse të gjata në rrjete sociale.

Shqipëria vazhdon rrugën e saj politike, ndërsa Lea Ypi largohet duke lënë pas një vend që, edhe këtë herë, arriti të krijojë një krizë, një debat dhe një “kryeministre” — pa pasur nevojë për qeveri.

Mirupafshim Lea Ypi – kryeministre për aq kohë sa zgjat një ide e hedhur në media.